د بغلان او وردګو تراژدي – افغان وطن ویبپاڼه

زیرمتون

اند او تحلیل

د بغلان او وردګو تراژدي

په داسي حال کي چي د قطر د اعلامیې رنګ لا نه دی وچ سوی، امریکايي او د کابل رژیم قواوو په بغلان او وردګو کي په دوو جلا جلا حملو کي ملکي او بې دفاع خلګ قتل کړل.

په بغلان کي، اشغالګرو امریکايي او د افغان رژیم عسکرو په ګډو بمباریو کي په یوې کورنۍ کي یوه مور او د هغې شپږ تنه ماشومان قتل کړي دي، او د ماشومانو پلار یې ټپي کړی دی.

محلي خلګو د قتل سویو افغانانو جسدونه پلخمري ته انتقال کړي ول، او هلته یې د اعتراض په توګه لویه لاره بنده کړې وه. هغوی د «مرګ پر امریکا» او «مرګ پر غني» شعارونه ورکول.
بلخوا، په وردګو کي پر یوه روغتون باندي د عملیاتو په ترڅ کي افغان عسکرو دوه تنه ډاکټران، دوه مریضان، او یو تن محافظ په بېرحمانه توګه قتل کړي دي. حال دا چي د قطر اعلامیه مشخصا وايي چي روغتونونه، مکتبونه، او ملکي کسان باید په نښه نه سي.

د قطر د اعلامیې له سپارښتونو څخه د کابل د رژيم او امریکایانو سمدستي سړغړونه په کلکه غندم، او دا یو جنګي جرم او جنایت ګڼم. د بغلان او وردګو له قربانیانو سره خپله خواخوږي اعلاموم، او پر امریکايي قواوو او د هغوی پر مزدورو افغان مسلح قواوو باندي د خدای لعنت وایم.

په بغلان کي، د مظلومو او زړورو افغانانو د اعتراضونو کلکه دفاع کوم، او پر ټولو افغانانو باندي ږغ کوم چي د امریکايي اشغالګرانو او د هغوی د داخلي مزدورانو د جنایاتو په مقابل کي چوپ او بې تفاوته پاتي نه سي، او پراخو مدني اعتراضونو ته مخه کړي، کنې په بل صورت کي به مدام قتل او وژل کېږي.

واحد فقیري

خپله څرګندونه مو پرې وکړئ

څرگندون

خپور کړه

ستاسو برېښناليک به نه خپريږي. غوښتى ځایونه په نښه شوي *