غزل / شاعر: جلال امرخیل – افغان وطن – افغان وطن ویبپاڼه
پوهنه او فرهنګ خبرونه

غزل / شاعر: جلال امرخیل – افغان وطن

د لوپټې سره دې ونیوې په خوله کې ګوتې
ځار دې له شرمه نور مې مه وهه په زړه کې ګوتې

ما ستا د زلفو په تارونو باندې وتړلې
زما له ګوتو ښویېدې په بارانه کې ګوتې

ډیرې زما د نیټې کرښې په کې څه له کاږې
درنه به پاتې شي جینۍ په دیواله کې ګوتې

د عشق له درده مې کړه داسې ناګهانه چغه
لکه ماشوم نه کله ونښلي په وره کې ګوتې

تر څو چې ته د زړه ګلاب راته رالیږې په کې
اوبه اوبه به وي له ما نه په ویاله کې ګوتې

په رکاتونو کې خطا کړم د بنګړو ماتیدو
د سودایانو غوندې شمارم په لمانځه کې ګوتې

ستا جدايۍ په خپل نصیب کړمه حیرانه پاتې
جلاله و مې سوځیدې په تناره کې ګوتې

خپله څرګندونه مو پرې وکړئ

څرگندون

خپور کړه

ستاسو برېښناليک به نه خپريږي. غوښتى ځایونه په نښه شوي *